Apartment sang Chinese national sa Arevalo, ginsulod sang 2 lalaki; Cash, cellphone kag salakyan, nataban

By: JoMaque | Nobyembre 8, 2020

Iloilo City — Ginsulod sang duha ka mga kawatan ang apartment sang 39-anyos nga lalaki nga Chinese national sa Florence Ville Subdivision sa Barangay Dulunan, Arevalo las 10:22 kahapon sang aga, Nobyembre 7.

Ginkilala ang biktima kay Li Wenqian, tumandok sang Fujian, China.
Si Li ang naga-arkila sang apartment sang masobra na duha ka tuig.
Suno kay Police Senior Master Sergeant Mark Olano, chief investigator sang Arevalo Police Station, ginrason sang duha ka mga suspetsado sa security guard sang subdivision nga ginapakadto sila ni Li para kuhaon ang L300 van.

Ginpasulod sang security guard ang duha sa pagpati nga ginpakadto gid man sila ni Li.

Nakibot naman si Li sang may nagsulod sa ila gina-estaran kag gintayaan siya sang kutsilyo.

Samtang, gindala naman sa maids quarter ang driver ni Li, ang kabulig sa balay kag ang isa niya ka tuig nga bata nga lalaki.
Gingapos sila sa tiil kag kamot kag ginbutangan sang packing tape ang ila nga baba.

Nakuha sang mga kawatan ang masobra P100,000 nga kuwarta, cellphone, kag ang L300 van nga gingamit sa pagpalagyo.

Na-recover sang Arevalo police sa ila gin-conduct nga hot pursuit operation ang L300 van sa Pakiad, Oton.

Nagapadayon pa ang imbestigasyon sang kapulisan sa identity sang mga suspetsado.