1 patay, 1 pilason matapos nakuryente sa Leon, Iloilo

By: Aine Grace Bravo, Aksyon Radyo Iloilo

LEON, Ilo., November 9, 2020 — Nakuryente samtang nagatakod sang WiFi antenna ang duha ka lalaki sa Barangay Buga, Leon mga las-3:40 kaina sang hapon, Nobyembre 9.

Ginkilala ni Police Lt. Sammy Gasataya, hepe sang Leon Police Station ang mga nakuryente kanday John Rey Camince, 20, kag John Lloyd Cabarellos, 22, pareho nga residente sang Barangay Buga.

Dead-on-arrival sa ospital si Camince, suno kay Gasataya, samtang pilason si Cabarellos sang nahulog halin sa atop sa diin sila nagatakud sang wifi antenna.

Base sa imbestigasyon sang police, natumba ang tubo nga gina-uyatan ni Camince kag nakatandog sa live wire rason nga nakuryente sila ni Cabarellos samtang nagatakod sang antenna sang WiFi. | via Jorge Cabrera