Arevalo police, may suspek na sa robbery hold-up sa balay sang negosyante nga Chinese

By: JoMaque | Nobyembre 10, 2020

ILOILO CITY — May mga suspek na ang Arevalo police sa robbery hold-up sa apartment sang negosyante nga Chinese sa Florenceville townhouse sa Dulonan, Arevalo sang Nobyembre 7.

Nagpamalibad si Police Major Edgar Anonoy, hepe sang Arevalo Police Station nga pangalanan ang duha ka suspek bangud nagapadayon pa ang imbestigasyon.

Suno sa iya, ginkalkal nila ang mga kaso sa siyudad nga may kasubong nga modus kag may kaanggid ang hitsura sang ila mga suspetsado.

May nauyatan naman sila nga litrato sang mga suspek nga nakuha sa rogue’s gallery sang Iloilo City Police Office. Ipakita ini suno kay Anonoy sa biktima agud makumpirmar niya kun amo gid man ang nagsulod sa ila apartment.

Sang Nobyembre 7, nagsulod ang mga suspek sa apartment ni Li Wenqian kag nagpanguha sang gamit.

Dala nila palagyo ang masobra P100,000 nga cash, cellphone kag L300 van pero na-recover ang salakyan sa Pakiad, Oton.

Desidido naman suno kay Anonoy nga magpasaka sang kaso ang biktima kun makilala na ang mga suspetsado.