Patrol car sang Culasi MPS, nadisgrasya sa Sibalom, Antique; Sibilyan nga sakay, patay; 7 lakip ang 4 police officers, pilason
By: JoMaque | Nobyembre 10, 2020
Antique — Isa ang patay, pito ang pilason sang na-aksidente ang patrol car sang Culasi Police Station sa Sibalom, Antique kaina sang aga, Nobyembre 9.
Suno kay PCPT Bryan Alamo, hepe sang Culasi MPS, halin sa ila estasyon ang patrol car kag pakadto sa provincial headquarters sa San Jose, Antique sang na-aksidente.
Gin-identify ni Alamo ang napatay nga sibilyan nga si Anamae Alpas, 25-anyos sang Bita, Culasi, nga sakay sa patrol car.
Pilason naman ang iban pa nga sakay sang patrol car nga sanday:
1. PSSg Romel Brenio, 32-anyos, driver sang patrol car, taga-Osorio, Culasi;
2. Pat. Monalisa Sayco, 26-anyos sang Camancijan, Culasi;
3. PSSg Novel Gerona, 39-anyos sang Jalandoni, Culasi;
4. Pat. Reynante Apolinario sang Buluangan I, Valderrama, Antique;
5. Marjoe Cel Montilla, 24-anyos sang Lindero, Tobias Fornier;
6. Lanaine Salvan, 26-anyos sang San Juan, Culasi; kag
7. Kevin Rey Dimamay, 27-anyos sang Centro Norte, Culasi.
Suno kay PCPT Alamo, maayo na ang kondisyon sang mga pilason, magluwas kay Pat. Apolinario nga ginsaylo sa ospital sa Iloilo City.
Base sa imbestigasyon suno kay Alamo, ma-overtake kuntani ang patrol car sa tricycle. Pero gulpi nagliko pa-wala ang motorsiklo nga yara sa unahan sang tricycle gani ginlikawan ini sang patrol car. Nagdiretso ang patrol car sa concrete fence kag nagtakilid. | via Aksyon Jorge Cabrera/Culasi MPS/Sibalom MPS