Mga pasahero nga maagi sa mga ports, ginpanugyanan nga mag-download sang ‘Traze’ app para sa QR Code — PPA

By: JoMaque | Nobyembre 11, 2020

ILOILO CITY — May gindugang nga requirement ang Philippine Ports Authority (PPA) sa mga pasahero nga maagi sa mga ports bilang kabahin sang ila contact tracing program.

Suno kay Engr. Antonio Belarga, designated spokesperson sang PPA – Panay and Guimaras, kinahanglan sang pasahero nga magkuha sang QR code halin sa application nga “TRAZE” para sa ila contact tracing.

Ma-register ang pasahero sang iya mga personal information sa nasambit nga app agud makakuha sang QR code nga amo naman, gamiton sa pagbyahe.

Pwede ini ma-download sang libre sa Google Play Store sa mga may android phone.

Sa mga wala naman sang cellphone kag wala naka-download sang app, mahimo nga makapangayu sang QR code sa Malasakit Help Desk sang PPA sa mga ports.

Kinahanglan suno kay Belarga ang QR code sa tiun nga magsulod sa mga ports kag pwede ini magamit tubtob tatlo ka tuig.

Sa subong suno sa iya, wala pa ini lubos nga ginapatuman bangud padayon pa ang ila information dissemination sa amo nga app.