By: JoMaque | Nobyembre 12, 2020

Iloilo City — May pagbag-o sa skedyul sang homecoming ni Miss Universe Philippines 2020 Rabiya Mateo bangud sang malain nga panahon sa Manila dala sang Bagyo Ulysses.

Natalana kuntani subong kag buwas ang homecoming activities sang beauty queen.

Pero suno kay Atty. Joebert Peñaflorida, presidente sang Iloilo Festivals Foundation, Incorporated, indi pagpasugtan nga makalupad ang eroplano nga sakyan ni Rabiya subong nga adlaw bangud sang bagyo gani ginsaylo ang event buwas, Nobyembre 13 kag sa Sabado, Nobyembre 14.

Hiwaton ang motorcade, courtesy calls kag press conference ni Rabiya sa Nobyembre 13, samtang sa Nobyembre 14 ang iya Community Outreach.

Ika-24 man nga kaadlawan sang beauty queen sa Nobyembre 14.

RUTA SANG MOTORCADE

Ginpalapad ang ruta sang motorcade ni Miss Universe Philippines Rabiya Mateo buwas sa aga, Nobyembre 13, agud malikawan ang pagdinaguso kag ma-practice ang physical distancing.

Suno kay Iloilo Festivals Foundation, Incorporated President Atty. Joebert Peñaflorida, magasugod las-nueve buwas sa aga ang motorcade.

Mahalin ang motorcade sa Richmonde Hotel kag magalabay sa Diversion Road, MH del Pilar pakadto sa Molo Plaza, Timawa Avenue pakadto sa Iloilo Doctor’s College sa diin na-gradwar si Rabiya, General Luna Street, F. Caram Street, JM Basa Street pakadto sa Plaza Libertad, Iznart Street, Valeria Street, Bonifacio Drive, Huervana Street pakadto sa La Paz Plaza, Commission Civil Street, Jalandoni Street, E. Lopez Street pakadto sa Jaro Plaza kag magabalik sa City Hall.

Bisan ang panihapon nga iga-host sang IFFI ang tungaon sa duha ka adlaw, suno kay Peñaflorida agud ma-practice ang proper health protocols.

Pwede makakuha sang litrato sang beauty queen bangud magasakay siya sa salakyan nga may sun roof.

Ginpahanumdom ni Peñaflorida ang mga Ilonggo nga i-practice ang health protocols pareho sang pagsuksok sang face mask kag face shield kag pag-obserbar sang physical distancing.

Ginahaylo man ang mga luyag magtan-aw nga magsuksok sang pula nga bayo ukon magdala sang pula nga flaglets, banners kag balloons bilang suporta sa beauty queen.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply