By: Aine Grace Bravo, Aksyon Radyo Iloilo

ILOILO CITY, November 13, 2020“Welcome come queen.”

Ini ang mensahe sa mga posters nga ginpalapta sa syudad sang Iloilo sa pagpauli ni Miss Universe Philippines Rabiya Mateo subong nga adlaw, Nobyembre 13.

Manug-las-12 kaina sang udto sang naghugpa sa Iloilo International Airport sa Cabatuan ang eroplano nga ginsakyan ni Rabiya halin sa Manila.

Nagdiretso ang beauty queen sa Richmonde Hotel sa Mandurriao sa diin nagsugod ang motorcade nga naglibot sa major thoroughfares sang syudad.

Sa pihak sang tagiti sang init, makita naman ang excitement sang beauty queen nga nakasuksok sang pula nga gown nga gindesinyo sang Ilonggo fashion designer nga si Ram Silva kag inspired sa Philippine national flag.

Mainit nga gin-abi-abi sang mga Ilonggos ang beauty queen. Kalabanan sa mga nagbantay sa kilid sang karsada agud makita si Rabiya ang nakasuksok sang pula nga bayo kag may bitbit nga pula nga flaglets bilang suporta sa beauty queen. 

Pasado las-dos sang hapon na natapos ang motorcade ni Rabiya nga pagasundan sang press conference.

May community outreach man siya buwas, Nobyembre 14 nga amo man ang iya ika-24 nga kaadlawan.

Magabalik si Rabiya sa Manila sa Domingo sang gab-i.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.