QR Code, i-require sa tanan nga nagaguwa-sulod sa Iloilo City

By: Aine Grace Bravo/Jeremae Ventar, Aksyon Radyo Iloilo

ILOILO CITY, November 13, 2020 – Iga-require sugod sa masunod nga bulan ang QR Code sa tanan nga nagasulod kag nagaguwa sa syudad sang Iloilo.

Suno kay Mr. Francis Cruz nga head sang IT Division sang City Government, mahimo na makaparehistro sa ila website agud makakuha sang QR Code, sugod Nobyembre 16, 2020.

Ginpahayag ni Cruz nga may duha ka semana nga moratorium para maka-comply ang tanan sa QR Code.

Ang QR Code ang ipakita sa mga kadtuan nga establisyimento sa syudad agud mas mahapos ang contact tracing. Kabahin gihapon ini sang mga protocols sang syudad sa pag-away sa COVID-19.

PAANO GAMITON ANG QR CODE?

1. Ang mga residente sang syudad ukon ang mga nagaguwa-sulod sa Iloilo City ang mag-register sa website nga ihatag sang Iloilo City Government, para sa QR Code. Ang website ang maka-generate sang QR Code.

2. Kun may na-generate na nga QR Code, dapat i-print kag ipa-laminate.

3. Kun magsulod sa mga establisyimento ukon opisina sa Iloilo City, ipakita ang QR Code sa mga nagabantay. Ang mga nagabantay naman ang ma-scan sang QR Code.

4. Kun ikaw ang dapat naka-quarantine bangud may exposure sa nagpositibo, mahibaluan ini paagi sa QR Code. Ang nagabantay sang establisyimento ang gilayon nga matawag sa Iloilo City Government para sa nagakaigo nga aksyon. | via Iloilo City Government