By: Aine Grace Bravo, Aksyon Radyo Iloilo

ILOILO CITY, November 13, 2020 – Todo panginwala si Andy Mahinay alyas Hapon, 38-anyos, sang Brgy. Nonoy, City Proper nga siya ang nagtiro sa Chinese nga negosyante sa Iznart St., City Proper kagab-i,Nobyembre 12.

Dead-on-arrival sa ospital ang biktima bangud sang pilas sa tangkugo lapos sa agtang. Kaina sang kaagahon lang na-establisar ang identity sang biktima paagi sa iya mga tinawo, pero nagpamalibad ang kapulisan nga maghatag sang pangalan santu man sa pangabay sang pamilya.

Suno kay Mahinay, “nag-surrender” siya agud matinluan ang iya pangalan. Ginpabutyag ni Mahinay nga yara siya sa ila balay sang natabu ang krimen.

Nagbalibad na nga maghatag sang dugang nga pahayag si Mahinay.

Suno naman kay former City Councilor Plaridel Nava, nag-surrender si Mahinay matapos nagpakig-angut sa iya ang pamilya.

Una nga gindala sa Kampo Delgado si Mahinay antes gin-turn over sa Police Station 1.

“HE WAS ARRESTED”

Ginpabutyag ni PMAJ Francisco Paguia, hepe sang Police Station 1, nga arestado nila si Mahinay.

Pagpanghold-up suno sa hepe ang ginasunod nga motibo sa krimen.

Sa una nga interview kay Paguia kaina sang aga, ginsaysay niya nga nadakpan nila ang 16-anyos nga lalaki nga nagserbe lookout kag amo ang nag-ako nga gintuyo nila i-holdap ang biktima.

Ginpahayag naman Punong Barangay Evanjoe Anonoy sang Nonoy, City Proper nga may nakakita nga may bata nga nagadalagan sa ila barangay kagab-i nga may bitbit nga sling bag.

Base sa impormasyon, gin-agaw sang mga suspetsado ang sling bag sang biktima kag wala pa na-recover tubtob subong. | via FIRINGLINE

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.