ILOILO CITY — Ginapahalong sang Department of Health 6 ang publiko sa mga “superspreader events” sa holiday season agud nga makalikaw sa COVID-19.

Suno kay DOH 6 epidemiologist Dr. Jessie Glen Alonsabe, makabig nga “superspreader events” ang selebrasyon sang Paskwa kag bag-ong tuig bangud sang mga pagtililipon.

Lakip man sa “superspreader events” ang mga holiday sales sang malls bangud sirado ang lugar kag ginadugukan sang madamo nga tawo.

Dapat, suno kay Alonsabe nga istrikto nga sundon ang minimum health standard pareho sang pagsuksok sang face mask kag face shield, paghugas sang kamot ukon paggamit sang alcohol kag pag-practice sang physical distancing.

Sa pagselebrar sang Paskwa kag bag-ong tuig, mas maayo naman, suno kay Alonsabel, kun magpamilya lang ang magtipon-tipon kag mangin ‘conscious’ man ilabi kun may kaupod nga mga tigulang.

Samtang sa party sang mga kumpaniya, mas maayo kun indi pagtingubon ang mga empleyado kag sa baylo, i-cluster sila sa kada division ukon department. | via Aljohn Torreta