POTOTAN, Iloilo – Ginpakamayo sang Pototan LGU nga ipa-iway ang tuigan nga Iwag Festival of Lights bangud sa COVID-19 pandemic.

Sang interview sang Aksyon Radyo program BBB kay Mayor Rafael Enrique “Addie” Lazaro kaina sang udto, Nobyembre 26, ginpa-athag niya nga mabutang lang sila sang dyutay nga mga dekorasyon kag lights sa plaza agud may simbolo sang Paskwa sa banwa.

Pero indi na ini kapareho sa nagliligad nga tinuig nga garboso ang mga desinyo kag ginadugukan sang madamo nga tawo halin sa iban nga lugar sa probinsya.

Indi man manami, suno kay Lazaro, nga magagasto sang daku ang LGU bisan may pandemya.

Ginpahanumdom naman ni Lazaro ang mga pumuluyo nga sundon gihapon ang minimum health standard agud makalikaw sa COVID-19. | via BBB