‘Reseller’, ‘Jumper’ sang kuryente, nadakpan sa Molo

ILOILO CITY – Gin-apprehend sang More Electric and Power Corporation ang ginatudlo “reseller” kag “jumpers” sa kuryente sa Barangay San Pedro, Molo kahapon, Nobyembre 27.

Suno kay More Power Spokesperson Jonathan Cabrera, ginkilala ang reseller kay Dionisio Oton nga residente sang amo nga lugar.

May naghatag sang impormasyon sa More Power rason nga gin-validate nila.

Si Oton ang supplier sang illegal nga koneksyon sang kuryente sa talyer nga ginapanag-iyahan ni Erene Dioso; Ukay-ukay kag videokehan nga ginapanag-iyahan ni Mina Jama; Carwash ni Almager Jama; Emission testing center ni Vicente Jaen; kag balay ni Jose Oton.

Sa pahayag ni Mina Jama sa Aksyon Radyo, wala sila nakahibalo nga illegal ang ila connection bangud may kaugalingon man sila nga kuntador sa diin P15 per kilowatt-hour ang ila ginabayaran.

Sa pagpangusisa naman sang personnel sang More Power, si Dionisio ang nagtakod sang linya.

Pasakaan sang kaso sang More si Dionisio. Ang pagkadakup sa nasambit nga illegal connection ang resulta sang ginlunsar nga programa sang More Power nga “Jumper Mo, Noche Buena Ko”, sa diin makabaton sang reward ang makatudlo sang mga “reseller ” sang illegal electrical connection.

Nagpamalibad naman nga maghatag sang iya statement si Dionisio.