Iloilo — Patay ang pulis sang gintiro sang wala pa makilala nga suspect sa Barangay Abilay Sur, Oton, kahapon, Nobyembre 28.

Suno kay Police Captain Robert Pancha, hepe sang Oton Police Station, ang biktima amo si Corporal Felfrance Lumahang, 32 anyos sang Batuan Ilaya, Oton.

Ginkumpirmar naman ni Iloilo Police Provincial Office Director Gilbert Gorero nga na-assign sa IPPO si Lumahang.

Sa impormasyon nga nakuha sang Aksyon Radyo sa Oton Police, motorsiklo ang gingamit nga salakyan sang suspect.

Gindala pa sa ospital ang biktima apang dead on arrival suno kay Pancha.

Natabo and krimen sa gina-construct nga radial road lapus sa Vista Mall.

Pasado las tres sang hapon sang nakabaton ang Oton police sang impormasyon nga may gintiro sa amo nga lugar.

Indi pa matumod kun pila ang mga suspetsado.

POLICE ASSET SI LUMAHANG

Nagahimo sang follow-up operation may kaangtanan sa illegal nga druga si Corporal Lumahang suno kay IPPO Director Colonel Gilbert Gorero.

Police asset suno sa iya si Lumahang kag may gina-transact nga illegal drugs para makahimo sang buy bust operation.

Ginpabutyag ni Gorero nga may kaangtanan sa buy bust operation sa Brgy. San Rafael, Mandurriao ang gina-follow up sang pulis nga subject sa illegal nga druga.

Posible suno kay Gorero nga namutikan sang suspek nga police asset ang iya ka-transaksyon kabangdanan gin-unahan niya lang tiro.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply