DTI-Iloilo, nagahimo sang weekly monitoring sa presyo sang mga noche buena products agud masiguro nga wala sang may magpamintaha sa holiday season

Iloilo — Nagahimo sang weekly monitoring ang Department of Trade and Industry-Iloilo sa presyo sang mga noche buena products agud masiguro nga wala sang may magpamintaha sa holiday season.

Ginpahayag ni DTI-Iloilo Director Judith Degala nga may price monitoring team sila nga gin-hire agud maglibot sa tanan nga retailers sa siyudad kag mag-check kun nagasunod sa SRP.

Sa mga banwa naman sa probinsya sang Iloilo, may negosyo center ang DTI nga amo ang nagahimo sang price monitoring.

Base sa monitoring sang DTI-Iloilo, wala sang paghulag sa presyo sang mga noche buena products sugod sang ginpagguwa ang suggested retail prices sang nasambit nga mga produkto sang nagligad nga tuig.

Suno kay Degala, dako ang nabulig sang DTI sa paghingyo sa mga manufacturers nga palampason lang ang paskwa kag bag-ong tuig agud indi man mabudlayan ang mga konsumedor.