Iloilo — May gina-imbestigaran na nga mga persons of interest ang Iloilo Police Provincial Office sa pagpatay sa police sa buy bust operation sa Barangay Abilay Sur, Oton sang Nobyembre 28.

Suno kay IPPO Director Col. Gilbert Gorero, persons of interest ang duha ka sakay sang motorsiklo nga nakita sa crime scene.

Indi pa maestablisar kun duha ukon masobra sa amo nga numero ang mga suspetsado.

Magatukod naman sang investigating team ang IPPO nga magatutok sa pagpatay kay PCpl Felfranz Lumahang, assign sa Provincial Drug Enforcement Unit.

Suno kay Gorero, upod ang PDEU lakip man si Lumahang sa drug operation sa Mandurriao kahapon, Nobyembre 28, antes nagluntad ang krimen.

Bangud ang area sang follow up operation sa amo nga drug operation yara sa Oton, gintugyan ini sang Mandurriao police sa PDEU.

Posible namutikan sang subject sa drug operation sa Oton nga pulis ang iya katransaksyon rason nakapangaman kag gintiro si Lumahang.

Nagpasalig naman si Gorero nga indi mabutang sa uyang ang natabo kay Lumahang bangud magapadayon ang ila kampanya batuk sa illegal nga druga tubtob nga madakpan ukon mapapas sila tanan.

Gintugyan ni Gorero kay PCaptain Jayson Pancha, hepe sang Oton Police Station, ang pagsabat sang dugang nga pamangkot natuhoy sa krimen apang wala pa siya naghatag sang pahayag.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply