Ginareklamo nga scammer, nadakpan sa Pavia; Masobra 10 complainants, desidido nga magpasaka sang kaso

ILOILO – Nadakpan sa entrapment operation ang ginareklamo nga scammer.

Ginhimo sang mga operatiba sang CIDG Iloilo City Field Office ang operasyon sa Pavia subong nga gab-i, Disyembre 1.

Masobra 10 ka mga complainants ang nagtipon sa opisina sang CIDG 6 agud magreklamo nga nakuhaan sila sang kwarta. Gin-identify naman ni PMAJ Jess Baylon sang CIDG Iloilo CFU ang ginareklamo nga si Marie Trixie Joguilon sang Ungka II, Pavia.

Suno kay Alyas Che sang Pavia, isa sa mga complainants, nag-post sa Facebook si Joguilon nga may job opening sa isa ka kalan-an sa Megaworld sa Mandurriao sang 2019. Nagpakilala suno kay Che ang babaye nga si You Cotuman.

Nag-private message si Che sa babaye sang nakita ang post kag nahisugtan nga makitaay sila sa Mandurriao. Ginpabayad siya sadto sang P1,500 para sa medical examination agud maka-trabaho.

Pero wala sang may nagtupa nga trabaho, dugang pa ni Che.

Ginkumpirmar ni Che nga nadakpan na sang nagligad nga tuig sa entrapment operation si Joguilon kag walo sila ang natuntohan, pero wala sila nagpasaka sang kaso.

Sang damlag lang, may nakita si Che nga Facebook post nga natuntohan man kag iya nga ginpakig-angutan. Ginpakita niya ang litrato ni Joguilon nga iya nakuha sang nagkitaay sila sang nagligad nga tuig, kag nakumpirmar nga isa lang ka tawo ang nagtunto sa ila.

Subong nga tuig, tatlo ang nagareklamo nga nakuhaan man sang kwarta ni Joguilon.

Desidido na sila subong nga magpasaka sang kaso agud mauntat na ang pagpanunto sang ginareklamo, suno pa kay Che.

Ginkuhaan sang pahayag sang Aksyon Radyo News team ang ginareklamo, pero wala siya nagasabat sa pamangkot.