By: Aine Grace Bravo | December 3, 2020

Oton, Iloilo — May isa ka pilas sang pagkatiro ang pulis nga napatay sa drug operation sa Barangay Abilay Sur, Oton sang Nobyembre 28.

Ini suno sa reliable source sang Aksyon Radyo Iloilo.Magluwas sa pilas sang pagkatiro, may bagras man sa wala nga kamot ang biktima nga si Police Corporal Felfranz Lumahang, tumandok sang Batuan Ilaya, Oton.

Base sa spot report halin sa Iloilo Police Provincial Office, nagahulat si Lumahang sa subject sang drug operation sang hinali lang siya gintiro sang suspect nga naga-angkas sa motorsiklo.

Ang operation ni Lumahang kabahin sang follow up operation may kaangtanan sa pag-aresto kay Mary Lee Zaragosa sa San Rafael, Mandurriao la 1:45 sang hapon.

Base naman sa blotter report sang Oton police, duha ka lalaki nga nagasakay sa motorsiklo ang nag-abot kag nagpanaog ang backrider kag nagtiro sa biktima las-3:15 sa hapon.

Nagpalagyo ang duha sakay sa motorsiklo pakadto sa circumferential road sa Brgy Pakiad, Oton.Pareho nga medium built ang panglawason sang mga suspek, naka-helmet sang itom, nakasuksok sang maong pants, nakasuksok sang jacket nga itom ang driver samtang naka-long sleeves ang backrider.

Las-3:20 sang hapon, nagtawag sa Oton Police Station si Police Major Gervinson Moyo, Team Leader sang Provincial Drug Enforcement Unit (PDEU), nga may natiruhan sa Abilay Sur, Oton.

Gilayon nga nagresponder ang Oton police sa pagpamuno ni Captain Jason Pancha.

Gindala si Lumahang sa Iloilo Doctors Hospital pero gindeklarar nga napatay las-3:50 sa hapon.

Las-9 sang gab-i, nagresponder ang SOCO personnel sa ginluntaran sang insidente.Na-recover nila ang black wallet nga ginapanag-iyahan sang biktima nga naga-unod sang PNP ID, ATM Card, Drivers license kag cash nga P5,830 nga ginturn-over sa evidence custodian.

MGA PALAMANGKUTANON

Kahapon, Disyembre 2, ginbalikan sang Aksyon Radyo News Team ang area sa diin nakita si Lumahang.

Ang insidente natabu sa wayang nga area sa bag-o gina-obra nga radial road sa Abilay Sur. Wala pa nasemento ang karsada. Uma ang magtimbang nga kilid kag ginabanta sa 500 metros ang pinakamalapit nga balay.

Naabtan sang News Team ang mga construction workers nga naga-obra sa karsada.Ginhinambit nila nga ang riprap nga duha ka dupa ang kalayuon halin sa gintumbahan ni Lumahang amo ang ila gin-obra sang adlaw nga ginpatay si Lumahang.Nagbalik sila sa ila barracks las singko sa hapon.

Kun basehan ang blotter, makita nga yara pa sa area ang mga construction workers sang gintiro si Lumahang mga las tres sang hapon.Pero suno sa mga construction workers, wala sila sang nabatian nga may pagbaisay ukon may nakita nga gintiro sa lugar.

Palamangkutanon man kun diin nagplastar ang back up ni Lumahang samtang nagahulat siya sa subject.

Magluwas diri, may netizen man nga nag-kwestyon kun ngaa si Lumahang ang nagserbe nga poseur buyer bisan pa nga tumandok man siya sang Oton, na-assign sa Oton PNP pero na-detail sa PDEU kag taga-Oton man ang subject kag may posibilidad nga makilala siya.Hipos ang pamunuan sang Oton PNP, ang PDEU kag bisan ang IPPO sa kamatayon sang pulis. | via Aksyon Hotline