ILOILO CITY — Nagpang-apat ang Western Visayas sa may pinakamadamo nga kaso sang Human Immunodeficiency Virus (HIV) sa Pilipinas.

Ini ang ginkumpirmar ni Mr. Adrian Ramos, HIV coordinator sang Department of Health 6, base sa ila record.

Suno sa iya, sa pihak sang COVID-19 pandemic, nadugangan sang 458 ka kaso sang HIV ang rehiyon halin sang Enero tubtob Setyembre subong nga tuig.

Naapektuhan ang intervention sang DOH 6 sa HIV campaign sa rehiyon bangud sang community quarantine apang nagpangita sila sang pamaagi agud magpadayon sang serbisyo.

Sa baylo magkadto gid sa health center, mahimo ma-subject sa HIV screening sa guwa sang health facility ang indibidwal sa giya sang personnel sang DOH kag ila partner agencies.

Ginpahayag pa ni Ramos nga nagapanguna naman ang Iloilo City sa Rehiyon 6 sa may pinakamadamo nga kaso. Ginasundan sang Iloilo Province, Negros Occidental, Bacolod City, Capiz, Aklan, Antique, kag Guimaras.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply