Tigbauan Iloilo—Gin-agaw sang duha ka pasahero ang belt bag nga naga-unod sang koleksyon sang Ceres bus sa Barangay Parara Norte las 8:15 kagab-i, Disyembre 6.

Suno kay Police Captain Roy Castro, hepe sang Tigbauan Police Station, halin sa San Jose Antique Ceres Terminal ang bus nga ginamaneho ni Marlon Manzano sang Hamtic, Antique nga may sakay nga mga pasahero kag padulong sa Iloilo City.

Ginpahayag ni Castro nga nagsakay sa Poblacion Guimbal ang duha ka lalaki kag pag-abot sa Parara Norte nagpanaug sila.

Suno kay Castro, gulpi lang nga gin-agaw sang isa sa mga lalaki ang belt bag sang konduktor nga si Jeremy Forten sang San Remigio nga naga-unod sang kapin P10,000 rason nga may nagluntad nga dinumugay.

Na-agaw sang mga lalaki ang belt bag kag nagpalagyo sa direksyon pakadto sa baybay.

Antes natabu ang insidente, ginsukot pa sang konduktor sang pamasahe ang duha pero nag-ayo sang P50 bangud kulang ang ila kwarta.

Nag-conduct sang hot pursuit operation ang Tigbauan police pero tubtob subong wala gihapon madakpan ang duha. l via Tigbauan PNP

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply