By: Aine Grace Bravo | December 7, 2020

ILOILO CITY – Aprubado na sang Iloilo Provincial Board ang amendment sa Curfew Ordinance agud mabuhi ang economic activities sa tunga sang COVID-19 pandemic.

Ginkumpirmar ni 2nd District Board Member June Mondejar nga halin las-nueve sa gab-i tubtob las-kuwatro sa kaagahon, ginhimo na nga las-10 sa gab-i tubtob las-kuwatro sa kaagahon ang curfew hours sa bug-os nga probinsya.

Suno kay Mondejar, nahangpan sang mga miembro sang Sangguniang Panlalawigan nga may mga Ilonggo nga nagapangita sang palangabuhian kun gab-i.

Gin-athag naman ni Mondejar nga bisan gin-adjust ang curfew hours, ginadumilian gihapon ang public gatherings kag istrikto nga gina-implementar ang minimum health standard pareho sang pagsuksok sang face mask kag face shield kag pag-obserbar sang physical distancing.

Epektibo gilayon ang bag-o nga curfew hours, suno sa board member. | via BBB