Daily COVID-19 cases subong nga Disyembre, mas mataas kumparar sang Nobyembre — COVID-19 Team spokesperson Jeck Conlu

ILOILO CITY — May pagtaas sa daily cases sang COVID-19 sa Iloilo City subong nga Disyembre kumparar sang nagligad nga bulan.

Gintumod ni Iloilo City COVID-19 Team spokesperson Jeck Conlu ang Jaro sa diin madamo ang na-record nga local transmission.

“Compare naton sang last month nga November and subong nga December, nagtaas ang mga figure naton sa mga daily cases diri sa siyudad.

Makita naton nga daw may pag-increase, amo ang district sang Jaro.

Daw dira gawa ang bulk sang mga local transmission naton, sa Jaro district.”

Suno kay Conlu, may na-admit sa ospital nga nangin index case. Ang iban naman may mga gatherings gid nga gintambungan antes ang pagpositibo sa COVID-19.

Daku gid ang tsansa suno kay Conlu nga madasig ang paglapta sang virus kun may gatherings kag sirado ang lugar.

Local transmission ang kadamuan sang mga kaso.

Base sa data sang Iloilo City COVID-19 Emergency Operations Center, may 15 average daily cases halin sang Disyembre 1 tubtob 10 sa siyudad.