ILOILO CITY — Ginkumpirmar sang Iloilo Festivals Foundation Inc. (IFFI) nga nalakip sa mga line-up activities sang virtual Dinagyang 2021 ang food festival.

Suno kay IFFI spokesperson Joyce Ann Clavecillas, gina-finalize pa ang mangin mechanics sini.

“Ang aton food fest, ari na di siya sa aton nga line-up but gina-finalize pa ni siya kun ano ang mangin mechanics or system sang pagpatigayon naton,” pahayag ni Clavecillas sa interview sang Aksyon Firingline.

Sa initial nga pagplano, posible nga hiwaton ini sa Enero 22 tubtob 24.

Gin-athag ni Clavecillas nga indi na ini pag-ipahamtang sa mga dalanon pareho sa mga nagliligad nga Dinagyang.

May lima ka mga ginapilian nga venues suno sa iya pero ginakunsiderar nila ang dalagku nga establisyemento sa siyudad bangud may control sila sa crowd kag may security personnel nga mabantay magluwas pa sa support group sang siyudad.

“May napilian nga five different locations man, diri sa Iloilo City but indi man siya sa mga dalanon pareho sang una nga makita naton sa mga dalanon sa downtown areas.”

Ginpasalig niya nga i-announce man nila ang kumpleto nga detalye sa food festival kun maaprubahan na ang mechanics.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply