By: Aine Grace Bravo | December 21, 2020

TARLAC — Patay ang mag-iloy sa Paniqui, Tarlac sang malapitan nga ginpangtiro sang pulis nga ila kasilingan pasado las singko kahapon sang hapon, Disyembre 20.

Ginkilala sang Tarlac police ang suspetsado kay Police Senior Master Sergeant Jonel Nuezca, 46 anyos, residente sang Barangay Cabayaosan, Paniqui kag assigned sa Parañaque City Crime Laboratory.

Sa pagpangusisa sang kapulisan, nag-abot ang pulis sa balay sang mga biktima nga sanday Sonya Gregorio, 52-anyos kag Frank Anthony Gregorio, 25-anyos.

May natabu nga komprontasyon antes gintiro ni Nuezca ang mga biktima gamit ang 9mm nga pusil.

Nag-ugat ang away sang magkasilingan sang ginsita sang pulis ang mga biktima bangud sa pagpalupok sang boga.

Ara man ang menor de edad nga bata nga babaye sang pulis kag makita sa naglapta nga video nga nagasinggitan sang “My father is a policeman” nga ginsabat naman sang tigulang nga biktima sang “I don’t care.”

Antes sini, may away na ang magpamilya bangud sang isyu sa road right of way pero na-settle sang barangay.

Nalagyo pa una ang pulis pero nag-surrender sa Pangasinan.

Gilayon naman nga nag-trending sa Twitter ang #JusticeforSonyaGregorio kag #StopTheKillingsPH kasunod sang insidente.

Nag-trending man ang “My father is a policeman” sa Twitter.

Kasuhan sang double murder ang pulis.—with reports from Inquirer, Twitter

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.