By: Aine Grace Bravo | December 23, 2020

ILOILO CITY — Pugok ang trapiko sa Iloilo City samtang nagahilapit ang paskwa.

Suno kay Public Safety and Transportation Management Office (PSTMO) Head Jeck Conlu, madamo gid man ang mga salakyan sa syudad bangud may mga nagahingagaw pamakal sang kinanglanon para sa Christmas Day.

Pero wala naglaum si Conlu nga madamo gihapon ang magguwa subong nga tuig nga holiday season bisan may COVID-19 pandemic.

Ginpahayag pa ni Conlu nga nagapadulong man sa syudad ang mga halin sa iban nga probinsya sa rehiyon.

“NAGDUGANG SA TRAFFIC CONGESTION”

Nagdugang sa pagpugok sang trapiko sa syudad kahapon ang 50% discount promo sang Petron Corporation nga nagdungan sa “lunch break” sang mga empleyado.

Magluwas pa ini sa on-going construction sang tatlo ka flyover sa major entry sa syudad.

Sa pihak sini, ginpasiguro ni Conlu nga naka-deploy 100% ang mga traffic enforcers. | via Farrah Mae Morano