By: Aine Grace Bravo | December 23, 2020

SAN ENRIQUE, Iloilo — Patay na sang nakit-an ang 17-anyos nga solterito nga gin-report nalumos sa Jalaur river sa San Enrique, Iloilo sang Domingo sang aga, Disyembre 20.

Suno kay Felipe Galino sang Mountain Tigers rescue group, las-siete sang aga kahapon, Disyembre 22, sang nakit-an sang iya mga pakaisa ang lawas ni Niño Asong Jabonillo nga tumandok sang Brgy. Bariga, Banate, sa pangpang sang suba.

Nagtabok sa suba si Niño upod ang iya pakaisa sakay sa balsa nga human sa kawayan sang nakasangit sila sa kawayan nga nagatibsok sa suba. Ginlabo nila ang kawayan pero nadulaan sang balanse kag nahulog sa suba si Niño.

Ginatinguhaan pa sang pakaisa nga luwason ang solterito, pero wala natabangan bangud sa mabaskog nga daludo sang tubig.| via Farrah Mae Morano