ILOILO – “Ang bata ko ginkuga asta mapatay. Ang duha ko [ka] apo, gintakpan sang tela, bayo ukon tuwalya ang ilong kag baba asta man mapatay.”

Ini ang ginpahayag ni Valentino Galache sang New Lucena, Iloilo sa kamatayon sang iya bata nga call center agent nga si Karina Galache Sia Cunco, 28, sa Taguig City nga una gin-report nagpanginmatay sang Disyembre 24.

Suno kay Galache, na-release na ang autopsy result sang medico-legal officer nga nag-autopsy sa bangkay kag natukiban nga wala nagpanginmatay ang iya bata kundi ginpatay.

Sang ginpahibalo ang amay nga nagpanginmatay ang iya bata, naka-istoryahanay pa sila sang suspek nga si Aiko Sia Cunco, bana sang biktima.

“Malumanay man kami nga nag-istoryahanay [Aiko]. Te siling ya kuno nagpakamatay, siling ko ipa-autopsy ko yan.”

“Nagduda pa gid ko kay nag-execute siya [Aiko] hambal sang ospital sang waiver nga sunugon. Siling ko indi, hulata niyo ko da. Makadto ko da, ipa-autopsy ta. [Hambal niya] ipa-cremate na lang uro-urada. [Pero] hambal ko, indi [kay] ipa-autopsy ta.”Ginlaragway man sang amay nga normal man ang ila pag-istoryahanay sang suspek.

Gilayon siya nga nakig-angot sa iban pa nila nga himata sa Manila agud mag-apas sa ospital para magbulig bangud wala sang mabantay sa kabataan sang Ilongga kag suspek.

Sang nag-abot na ang himata sa ospital, nagpauli naman ang suspek sa ila balay kag wala na nakabalik sa ospital.

Gilayon man nga nagpadulong sa Manila ang amay sang biktima agud hikuton ang mga dokumento.

Ginpasugat ni Val sa iya hinablos si Aiko sa ila balay agud magpirma sang dokumento sa ospital pero nasugata ang suspek nga duguon kag nagaduroy lang sa dalan.

Nagdiretso ang hinablos kag ang suspek sa barangay hall sa diin nag-ako si Aiko nga ginpamatay niya ang iya kabataan.

Ginkadtuan ang crime scene kag naabtan nga patay na ang duha ka bata nga naga-edad sang tatlo ka tuig nga babaye kag isa ka tuig nga bata nga lalaki sa ila balay sa North Signal, Taguig City.

Gin-ako man sang amay nga wala gid nakapanugid sa iya si Karina nga ginasakit siya sang iya bana bisan permi sila naga-istoryahanay paagi sa cellphone.

Kamagulangan sa tatlo ka mag-ulutod si Karina. Palaligban man sa pamilya bangud wala ginapasugtan sang suspek nga makabisita ang Ilongga sa ila pamilya sa Manila.

Ginahikot na sang amay ang mga dokumento agud madala pauli sa New Lucena, Iloilo ang bangkay sang iya bata kag mga apo.

May problema naman sa pinansyal ang pamilya sa pagbyahe sa bangkay. Wala pa nakakitaay ang amay sang Ilongga kag suspek.

Hustisya naman ang gina-singgitan sang pamilya kag gusto gid nila nga mapreso ang suspek.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply