Iloilo City — Nagalalain ang pamilya Alcala sang aresto sang mga miyembro sang Criminal Investigation and Detection Group (CIDG) Iloilo City Field Unit ang ila himata matapos nakuhaan sang pusil sang gin-isyuhan sang search warrant sa Brgy. Sto. Niño Norte, Arevalo kaina sang aga, Disyembre 26.

Suno kay Magdalena Alcala, iloy sang gindakop nga si John Woody Alcala, nakibot na lang sila sang may nag-alabot nga mga operatiba sa ila balay samtang nagapangape ang iya nga bata.

Hinali lang suno sa iya gintayaan sang pusil sang isa sa mga operatiba si John kag ginhambalan nga indi maghalin.

Ginpakita sang pulis ang ila search warrant nga dala. Gin-search sang mga operatiba ang balay kag may nakit-an suno kay Magdalena nga pusil ang mga pulis sa bag nga nakakabit sa likod sang ila nga balay.

Na-recover sang kapulisan ang isa ka unit sang .45 cal pistol, isa ka magazine, pito ka mga bala sang .45 cal., shoulder bag, kag isa ka unit sang replica handgun.

‘SALA ANG PANGALAN’

Ginkatingala naman ni Magdalena ang sala nga pangalan sang subject sa search warrant nga ginpakita sang mga operatiba.

Lain ang middle name sang iya bata sang sa nabutang sa warrant.

John Abacajin Alcala ang subject nga nabutang sa warrant apang suno kay Magdalena, John Woody Alimanggo Alcala ang matuod nga pangalan sang iya nga bata.

Ginpabutyag man ni Magdalena nga wala sila sang kilala nga John Abacajin Alcala .

Ginatinguhaan pa sang Aksyon Radyo nga makuhaan sang pahayag ang CIDG may kaangtanan diri.

*Interview with Magdalena Alcala, iloy sang gindakop nga lalaki.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply