9 personnel sang LGU Oton, nagpositibo sa COVID-19; Munisipyo, nagpatuman sang partial lockdown

Iloilo — Nagpositibo sa COVID-19 ang siyam (9) ka mga personnel sang LGU Oton.Suno kay Mr. Jafet Salinas, spokesperson sang LGU Oton, nagpatuman na sang partial lockdown ang munisipyo halin Disyembre 26 tubtob Enero 3 sa masunod nga tuig.

Dugang pa ni Salinas nga lima (5) ka mga empleyado sang Accounting Office ang nagpositibo sa balatian kag apat (4) naman sa Mayor’s Office.

Indi man matul-id sang LGU Oton kun paano nagpositibo ang mga natungdan bisan nga hugot man nila nga ginapatuman ang mga safety protocols kaangay sang paghugas sang kamot kag pagsuksok sang face mask kag face shield.

Yara naman sa quarantine facility ang mga nagpositibo upod ang ila pamilya kag gilayon nga naghimo sang contact tracing ang LGU Oton agud mahibaluan ang naka-close contact sang mga nagpositibo.

Isa man sa nagpositibo sa balatian si Oton Mayor Carina Flores suno kay Salinas.

Gilayon nga nagpa-swab test si Mayor Flores sang iya nahibaluan nga may nagpositibo sa iya nga opisina.Mahimo naman sang disinfection sa munisipyo sa mga na-apektuhan nga mga opisina agud indi na maglapta ang COVID-19. l Via Firingline