New Lucena LGU, mabulig sa pamilya sang Ilongga, duha niya ka bata nga ginpatay sa Taguig City

By: Aine Grace Bravo | December 28, 2020

NEW LUCENA, Iloilo – Nagpasalig si New Lucena Mayor Liecel Mondejar- Seville nga buligan sang banwa ang pamilya sang Ilongga nga ginpatay sa Taguig City sa diin suspek ang iya bana.

Tumadok sang New Lucena, Iloilo ang Ilongga pero sa Taguig City na naga-estar.

Suno kay Seville, “Tinguhaan gid naton no. Kay te laban-laban sina ang problema kun paano mapapuli diri [ sa Iloilo], mabulig kita dira, ma-assist kita kun paano naton sila mabuligan nga mapapuli diri.”

Mangayo man sang bulig ang alkalde sa Iloilo provincial government ilabe pa nga tatlo ka bangkay ang dal-un sa Iloilo halin sa Manila nga ginalakipan sang bangkay sang Ilongga kag duha niya ka kabataan nga ginpatay sang ila amay nga si Aiko Sia Cunco, 29.

Mahatag man sang burial assistance ang alkalde kag buligan man ang pamilya kun ano pa nga assistance ang ila kinahanglanon.

Nagpalab-ut naman sang pagpakig-unong si Seville sa pamilya sang nalisdan. –via BBB