8 patay sang gin-report nga nagbato sa police operation sa Tapaz, Capiz kag Calinog, Iloilo

By: Aine Grace Bravo | December 30, 2020

PANAY – Walo ang gin-report nga napatay sang gin-alegar nagbato sa mga pulis nga nagserbe sang search warrants sa nagkalain-lain nga lugar sa Tapaz, Capiz kag Calinog, Iloilo subong nga aga, Disyembre 30.

Ginkumpirmar ni PCOL Julio Gustilo, director sang Capiz Police Provincial Office, ang impormasyon.

Suno naman kay PLTCOL Gervacio Balmaceda, chief sang CIDG s6, nagserbe sila sang search warrants sa 22 ka indibidwal sa Tapaz, Capiz kag tatlo (3) sa Calinog, Iloilo sugod las-kwatro kaina sang kaagahon.

Dugang niya, “high value personalities” sang Communist Party of the Philippines ang mga ginserbihan sang search warrants bangud sa illegal possession of firearms and explosives.

Sa Tapaz, pito ka mga barangay ang covered sang police operation, samtang duha (2) naman ka mga barangay sa Calinog.

Ginkumpirmar man ni Police Regional Office 6 Director PBGEN Rolando Miranda nga may walo ka napatay, 15 ka gindakup, kag duha ka nakapalagyo.

Gindala sa police stations ang mga nadakpan.

Nagtingub ang pwersa sang mga pulis kag military sa nasambit nga operation. – via Aljohn Torreta/Brian Valle/Francisco Enar