By: Aine Grace Bravo | December 31, 2020

KAMPO DELGADO, Iloilo City — Ginpasakaan na sang kaso ang pito ka mga indibidwal nga nalakip sa mga ginserbihan sang search warrant sa joint operation sang mga pulis kag military sa Calinog, Iloilo kag Tapaz, Capiz kahapon, Disyembre 30.

Suno kay Police Regional Office 6 spokesperson PLTCOL Joem Malong, ginpasakaan sang illegal possession of firearms and explosives ang pito ka mga indibidwal sa Calinog.

Anum sa amo nga numero ang arestado sa operasyon, samtang isa ang wala nadakpan bangud wala sa ila balay sang ginserbe ang search warrant.

Ang mga ginpasakaan sang kaso amo kanday Rodolfo Castor Diaz, Lauriano Lozada Castor Jr, Benito Diaz Caballero, Marilyn Chiva, Welsio Chiva, Luisito Bautista, kag ang wala nadakpan nga si Fortunato Legarion.

Sa kustodiya sang Calinog police ang mga nadakpan.

Gindala sa Calinog Police Station ang bata ni Legarion, apang ginpapuli man pagkatapos na-verify ang iya profile.

Wala pa sang impormasyon ang PRO 6 kun ginpasakaan naman sang kaso ang 10 ka nadakpan sa Tapaz, Capiz.

Wala nalakip sa ginpasaka nga kaso ang paglapas sa Anti-Terror Law bangud gina-verify pa sang mga pulis ang impormasyon sang ginpahayag kaangtanan sa Communist Party of the Philippines New People’s Army sang mga gin-subject sa operation.

Una na ginpahayag ni CIDG 6 chief PLTCOL Gervacio Balmaceda nga “high value individuals” sa CPP NPA ang mga gin-subject sa operation. – via Aljohn Torreta

Leave a Reply