(Update) 9 patay, 16 arestado kag 2 nakapalagyo sa simultaneous police operation sa Tapaz, Capiz kag Calinog, Iloilo kahapon, Disyembre 30
By: Jocelyn Maque | December 31, 2020
PANAY – Siyam (9) ang napatay sang gin-alegar nagbato sa mga pulis nga nagserbe sang search warrants sa nagkalain-lain nga lugar sa Tapaz, Capiz kag Calinog, Iloilo kahapon sang aga, Disyembre 30.
Ginkumpirmar ini ni PLTCOL Gervacio Balmaceda, chief sang Criminal Investigation and Detection Group (CIDG 6).
Suno kay Balmaceda, nagserbe sila sang search warrants sa 28 ka mga indibidwal sa Tapaz, Capiz kag Calinog, Iloilo sugod las-kwatro kahapon sang kaagahon.
16 ang naaresto sa police operations samtang duha naman ang nakapalagyo base sa initial report sang Regional Internal Affairs Service (RIAS 6).
Ang mga napatay naghalin sa Barangay Lahug, tatlo (3); isa (1) sa Barangay Tacayan; isa (1) sa Barangay Aglinab; isa (1) sa Barangay Acuña; isa (1) sa Barangay Da-an Sur kag duha (2) sa Barangay Nayawan, Tapaz.
MGA NAPATAY:
1. Roy Giganto
2. Reynaldo Katipunan
3. Mario Aguirre
4. Maurito Diaz Sr
5. Eliseo Gayas Jr
6. Artilito Katipunan
7. Jomar Vidal
8. Garson Catamin
9. Rolando Diaz Sr
MGA NADAKPAN SA CAPIZ:
1. Rolando Caspillo Sr
2. Jucie Caro
3. Marilou Catamin
4. Eleuteria Caro
5. Rollen Catamin
6. Marilyn Chiva
7. Welsio Chiva
8. Luisito Bautista Sr
9. Benny Lorana
10. Rodolfo Diaz
11. Benito Caballero
12. Ailyn Catamin
13. Marivic Aguirre
14. Lauriano Castor
15. Ferdinand Caspillo
16. Carlito Diaz
NAKAPALAGYO:
1. Allan Caspillo
2. Abelardo Diaz
Kabahin suno sa iya sang Oplan Paglalansag sang CIDG ang operation.
Dugang niya, “high value personalities” sang Communist Party of the Philippines ang mga ginserbihan sang search warrants bangud sa illegal possession of firearms and explosives.
Sa Tapaz, pito ka mga barangay ang covered sang police operation, samtang duha (2) naman ka mga barangay sa Calinog.
Gindala sa police stations ang mga nadakpan.
Nagtingub ang pwersa sang mga pulis kag military sa nasambit nga operation.
Nahamtang sa nabukid nga bahin ang mga lugar sa diin gin-conduct ang operation.
GINBAKLID KAG GINPOSASAN
Sa interview sang Aksyon Radyo Iloilo kay Kim sang Brgy Lahug, Tapaz, Capiz kag bata sang isa sa mga subjects sang search warrant, ginbaklid siya kag ginposasan sang mga pulis.
Pero nakapangita siya sang tsansa nga makapalagyo kag nagpanago sa katalunan upod sa iya mga pakaisa.
“Gin-raid nila ang pamalay isa-isa tapos nagpinalupok sila kag ginpaguwa nila ang tawo, tapos ginpangbaklid kami kag ginposasan, ” ang pahayag ni Kim.
Suno sa iya, na-missing ang iya iloy nga si Marivic Aguirre.
“Si mama gani sir, gin-plantedan sang pusil kag granada,” dugang pa ni Kim.
Magluwas sa iya iloy, lakip man suno sa iya sa mga ginserbihan sang search warrant amo sanday Reynaldo Katipunan nga barangay kagawad; Jovelyn Giganto, barangay kapitan; Roy Giganto, bayaw ni Jovelyn kag Mario Aguirre, paryente sang iya iloy.
Ginpahayag ni Kim nga wala siya gilayon nakaguwa sa ila balay bangud nahadlok siya sang naglinupok na.
Base sa iya nakita, napilasan si Mario Aguirre nga gindala sa ospital samtang nakita man niya nga wala na nagahulag sanday Roy Giganto kag Reynaldo Katipunan.
Gin-athag naman ni Kim nga wala sila sang koneksyon sa CPP-NPA kag mga miembro sila sang Indigenous People sa Tapaz.
Magluwas sa Lahug, nagserbe man sang search warrants ang mga pulis kag suldado sa mga indibidwal sa Brgy. Tacayan, Nayawan, Acuña, Aglinab kag Roosevelt suno kay Kim.
‘SINAPAT NGA BATASAN’
Nanindugan naman ang mga asawa nanday Giganto kag Katipunan nga wala sang may nagserbe sang search warrant sa ila sa baylo pwersa nga nagsulod ang mga pulis kag suldado sa ila balay.
Suno kay Analyn Giganto, nagatulog siya upod ang iya bana kag duha nila ka mga kabataan sa ila kwarto sang hinali lang naglagapok ang ila pwertahan.
Nakibot na lang sila nga hinali lang nagpangtaya sang pusil ang mga lalaki nga nagsulod sa ila balay.
Ginlalas sang mga lalaki ang mag-asawa apang nagpanguyapot si Analyn sa ila pwertahan.
Nakibot na lang si Analyn sang hinali nakabati siya sang duha ka mga lupok.
Liwat nga nakabati si Analyn sang tatlo ka sunod-sunod nga mga lupok antes nakit-an ang iya bana nga natumba kag duguon.
Amo man ang pahayag ni Marites Katipunan, asawa ni Barangay Kagawad Katipunan.
Nakibot man si Marites sang hinali lang may nagsulod sa ila balay kag pwersa sila nga ginpaguwa magluwas sa iya bana.
Anum (6) ka lupok sang pusil ang nabatian ni Analyn halin sa sulod sang ila balay.
Lunsay ginpanginwala nanday Analyn kag Marites nga may mga pusil ang ila mga bana.
Dugang nila, wala man sila sang kaangtanan sa CPP-New People’s Army.
Ginpahayag nga may na-recover nga 2 granada kag pusil sa balay ni Giganto apang nanindugan si Analyn nga ‘planted’ ini.
Suno sa iya, kun may ara gid man sila nga pusil, kuntani gingamit na niya ini batuk sa mga nagsulod sa ila balay pagkatapos nila tiro sa iya bana.
Ginpabutyag ni Analyn nga kasubong sang ‘sapat’ ang batasan sang nagtiro sa iya bana.
Dugang ni Analyn, handa sila nga mag-asawa kuntani sa pag-atubang sa anuman nga ipasaka nga kaso sa korte apang ginpatay gid ang iya bana.
Plano sang pamilya sang mga natungdan nga magdangop sa Commission on Human Rights 6.
Nagakahangawa man ang mga pumuluyo sa barangay sa ila seguridad pagkatapos sang insidente.
