By: Aine Grace Bravo | January 8, 2021

ILOILO — “Wala ako naga-inom sang makahulubog nga ilimnon. Kun mapilitan, tama gid ka-moderate. Wala ako tsansa nga mag-transform ukon magtigbaliw. Bisan sin-o updon ko nga babaye, indi gid ako mapukaw kay kilala ko nga ang akon balatyagon, babaye.”

Ini ang pahayag ni Alimodian Mayor Kalay Alonsabe sa tunga sang madamo nga mga reaksyon sa pahayag ni Makati City police chief Col. Harold Depositar nga, “Lalaki pa din sila. May instinct ‘yan and… you know, lalo na if you’re under the influence of intoxicating alcohol, and kung may presence of drugs pa — lalo na” nga nagatumod sa mga agi nga naka-upod sang napatay nga flight attendant nga si Christine Dacera.

Suno kay Alonsabe, “may posibilidad” nga magguwa ang pagkalalaki sang agi kun maka-inom bangud diri gid nagagguwa ang iya sexual preference, “may agi nga kun mahubog siya abi mo kun sin-o gid pero dira makita ang iya sexual preference.”

Gin-athag ni Alonsabe nga may mga ginatawag nga silahis sa LGBTQ community nga nagaka-attract sa babaye kag lalaki amo nga may ginasiling nga “agi nga nagapanglungi.”

Pero ini tanan suno sa iya nakadepende sa paglantaw kag matuod nga balatyagon sang agi.

Sa iya bahin, ginpahayag ni Alonsabe nga wala gid sang tsansa nga ma-attract siya sa babaye, “damo mga gwapahon nga natupad ko, isa lang kami ka kama pero wala gid ako napukaw kay indi ko kaya.”

Nakaagi suno sa iya nga ginsaskuhan siya kag may ginbayaran nga babaye pero wala gid sang may natabu.

Dugang niya, ang pag-ako niya nga agi siya ang naghatag sa iya sang kahilwayan kag nangin alagyan agud batunon siya sang mga pumuluyo.

Pahayag pa niya, “indi kinahanglan nga magtagu-tago. Subong ya importante transparent ka para wala ka sang identity crisis.”

Nagsikat sadto ang pahayag ni Alonsabe nga “agi ako pero indi ako makawat.”