Halos tanan nga merkado sa Iloilo City, nagagamit sang kilohan nga may daya — EA on LEEO
ILOILO CITY — Halos tanan nga merkado sa Iloilo City may nagagamit sang kilohan nga may daya.
Ini ang ginbuyagyag ni Executive Assistant on Local Economic Enterprise Office ukon LEEO Simplicio Subaldo base sa iya na-obserbahan sang ginlibot ang tanan nga merkado sa siyudad.
Sa tanan nga merkado, ang Iloilo Terminal Market gid ang may pinakamadamo nga nagagamit sang kilohan nga may daya kag nagapanguna ang fish section.
“Ang damo gid ya nga salawayon, ara gid sa [Iloilo] Terminal Market tapos La Paz. [Sa] La Paz, madamo man nakuha ko [kilohan nga may daya], may ara man sa Jaro big, small, may ara man sa Arevalo, may ara man sa Molo, daw halos kalabanan nakuhaan ko pero ang pinakadamo ara sa Terminal Market.”
Istilo suno sa iya sang pila ka mga vendors nga nagagamit sang duha ka kilohan kag isa diri ang may daya.
Ginatago ini sang pila ka mga vendors kun makita nila nga nagalibot ang inspection team.
Bilang tikang suno kay Subaldo, naglapta sa pag-operate ang inspection team kag sorpresa nga ginabisita ang mga merkado kada semana.
Ginpahibalo man ni Subaldo ang mga bumalakal nga tan-awon gid kun may silyo ang kilohan agud masiguro nga wala sang daya.
“MAPAHALIN SA PWESTO”
Ginpaandaman man niya ang vendors nga pila ka beses nadakpan nga posible mapahalin sila sa ila pwesto.
Suno kay Subaldo, isumiter ang pangalan sang vendor nga pila ka beses nadakpan kay LEEO Head Maricel Mabaquiao kag ipadala pa gid sa City Legal Office agud mahibaluan kun ano nga kaso ang pwede nga mapasaka batuk sa ila.
“Kun madakpan namon nga segi-segi.. te syempre ipadala na inang pangalan niya kay Maricel Mabaquiao, sa department head [sang LEEO] tapos i-foward namon sa City Legal [Office] kun ano nga mga kaso ang dapat i-kaso sa ila otherwise kuhaon ang ila pwesto paga-islan sang mga tawo nga willing nga mag-negosyo nga wala nagapangdaya.”
“MABALIK ANG KUMPYANSA”
Ginapanindugan ni Subaldo nga katuyuan nila nga mabalik ang kumpyansa sang mga bumalakal sa mga merkado kun wala na sang nagapangdaya sa kilohan.
Dugangan man ang kilohan ng bayan sa mga merkado nga maggamit sang mga bumalakal agud masiguro nga wala sila gindayaan.