By: Aine Grace Bravo/Jo Maque | January 13, 2021

Iloilo City — 20 na ka mga personnel sang Department of Health 6 ang nagpositibo sa COVID-19.Suno kay Dr. Mary Jane Juanico, designated spokesperson for COVID-19 concerns sang DOH 6.

Enero 9 sang gin-report sang DOH 6 nga may 12 sila ka mga personnel nga nagpositibo.

Nadugangan pa gid ini sang duha (2) sang Enero 10, tatlo (3) sang Enero 11, duha (2) kahapon kag isa (1) subong nga aga, Enero 13.

Kalabanan sa mga nagpositibo ang may sintomas nga nabatyagan, tatlo sa ila ang admitted sa ospital samtang naga-isolate sa ila balay ukon sa pasilidad sa ila banwa.

Sa kabug-usan, 170 ang identified close contacts sang mga nagpositibo.

49 pa lang sa amo nga numero ang may negatibo nga resulta sang RT PCR test.

‘4 index cases’

Na-identify na sang DOH6 ang apat ka mga indibidwal nga ginakabig index cases ukon posible ginhalinan sang transmission.

Magluwas sa exposure sa komunidad sang Christmas break, duha man ka mga index cases ang may miembro sang ila pamilya nga may active case sang COVID-19 ukon wala pa naka-recover.Ang mga personnel nga nagpositibo ang nagapuyo sa Iloilo City kag mga banwa sang Alimodian, Pavia, Sta. Barbara, kag Oton sa probinsya.

Porsyon lang sang DOH6 regional office ang naga-function kasunod sini.

May gintalana na nga schedule para sa disinfection.

Apektado gid …pati ang vaccination program’

Bangud kalabanan sang mga nagpositibo ang technical personnel sang DOH6, apektado gid ang madamo nga mga programa sang ahensiya lakip na ang vaccination program.

Suno kay Dr. Juanico, apektado ang preparasyon para sa nationwide Measles Rubella-Oral Polio Vaccine Supplemental Immunization Activity nga gintalana sa Pebrero.

Matandaan, may doctor man nga nagatrabaho sa DOH6 nga nagpositibo sa COVID-19 sang nagligad nga tuig.

Nagapahanumdom ang DOH6 sa pag-observe sa gihapon sang minimum health standards kasubong sang paggamit sang face mask kag face shield, masami nga paghugas sang kamot ukon paggamit sang alcohol ukon sanitizer, kag pag-observe sang physical distancing agud malikawan nga matapikan sang COVID-19.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply