Bag-o nga variant sang COVID-19 nga una na-detect sa UK, nakasulod na sa Pilipinas — DOH
Manila — Na-detect ang bag-o nga variant sang COVID-19 sa 29-anyos nga lalaki nga taga-Quezon City nga nagpauli halin sa Dubai sang Enero 7, 2021.
Base sa statement sang Department of Health, Disyembre 27, 2020 nagpadulong sa Dubai ang lalaki para sa iya business trip upod sa iya nobya.
Enero 7, nag-abot sila sa Pilipinas kag gilayon nga gin-swab kag gin-quarantine sa hotel. Enero 8, nagguwa ang resulta sang ila RT-PCR test kag natukiban nga nagpositibo sa virus ang lalaki.
Negatibo naman ang resulta sang test sang iya nga nobya.
Naka-facility quarantine na ang lalaki samtang naka-strict home quarantine naman ang iya nga nobya kag padayon pa nga gina-obserbaran.
Naghimo na sang contact tracing ang Quezon City Government sa mga naka-close contact sang duha.
Lunsay asymptomatic ang ila mga close contact kag istrikto nga naka-home quarantine.
Gin-athag sang DOH, nga wala sang contact ang duha sa pasyente nga positibo sa COVID-19 antes sila nagpa-Dubai kag wala man sang iban nga mga aktibidad sa guwa sang Quezon City.