Mag-asawa nga pulis sa siyudad sang Iloilo, gin-dismiss sang NAPOLCOM
Iloilo City — Gin-dismiss sang NAPOLCOM ang mag-asawa nga pulis sa syudad sang Iloilo nga ginreklamo nagpamahog kag naghimo sang unlawful arrest.
Ginkumpirmar ni NAPOLCOM 6 Dir. Joseph Celis nga gin-dismiss sa serbisyo kanday Patrolman Welnie Bagatela kag Patrolwoman Ma. Agnes Bagatela.
Ang NAPOLCOM En Banc ang nagdesisyon sa dismissal order.Mahimo maka-appeal ang mga natungdan apang epektibo gilayon ang order sa pagbaton sang kopya sang mag-asawa.
2016 sang ginreklamo ang mag-asawa ni Jina Huelar sa Relocation Site, San Isidro, Jaro.Grave Misconduct for Grave Threats and Unlawful Arrest ang ginpasaka nga kaso batuk sa mag-asawa.
Ginkabig man sila nga recidivist bangud sang madamo nga mga kaso administratibo nga ginpasaka batuk sa ila.
Ginatinguhaan sang Aksyon Radyo Iloilo nga makuhaan sang pahayag ang mga natungdan. Sa inisyal nga impormasyon, na-assign sa Headquarters Support Unit ang mag-asawa.
