By: Aine Grace Bravo | January 18, 2021

STA. BARBARA, Iloilo – Nakaluwas ang duha ka empleyado sang DPWH 4th District Engineering Office sang gintiro sang riding-in-tandem sa Brgy. Bolong Oeste Sta. Barbara, Iloilo las 7:40 subong nga aga, Enero 18.

Suno kay PMAJ Raymund Celoso, hepe sang Sta Barbara Police Station, pakadto sa ila opisina ang duha ka empleyado sakay sa service pick-up sang DPWH sang gintiro sang riding-in-tandem.

Gin-identify ni Celoso ang mga sakay sa pick-up nga kanday Engr. Eva Bedonia, chief sa Quality Assurance Section, kag ang driver nga si Rogelio Serilo Jr.

Nagpalagyo sa direksyon sang Cabatuan ang mga suspetsado, suno kay PMAJ Celoso.

May lima ka igo sang bala sa passenger side sang pick-up.

“MAY PAMAHOG SADTU”

Nakabaton sang pamahog sang nagligad nga duha ukon tatlo ka tuig si Engr. Bedonia.

Suno kay Engr. Perla Laguardia, Assistant District Engineer, nakapanugid si Bedonia nga may pamahog sa ila pamilya.

Pero wala na sang may na-istorya si Engr. Bedonia nga may yara sang naakig ukon may kontra siya sang tinalikdan nga mga binulan ukon semana.

Nagapati si Laguardia nga wala sang kahilabtanan sa trabaho ni Engr. Bedonia ang motibo sa pagtiro sa iya.

Nagapadayon ang imbestigasyon sang mga pulis sa motibo sa natabu. –via Aksyon Hotline