3 PDLs sa BJMP 6 facility sa Pototan, nagpositibo sa COVID-19

By: Aine Grace Bravo | January 18, 2021

ILOILO –Halin sa mga police stations sa Iloilo City ang tatlo ka mga persons deprived of liberty (PDLs) nga nagpositibo sa COVID-19 sa Iloilo Provincial District Jail sa Brgy. Nanga, Pototan.

Suno kay Bureau of Jail Management and Penology (BJMP) 6 Deputy Regional Director for Administration kag Spokesperson Jail Senior Supt. Gilbert Peremne, Enero 8 sang gin-commit sang Philippine National Police sa jail facility ang tatlo ka mga preso. Duha sa mga inmates ang halin sa La Paz Police Station kag isa halin sa Mandurriao police station.

Nalakip ang tatlo sa 63 ka mga PDLs kag siyam ka BJMP personnel nga gin-swab sang Enero 13.

Ginsaylo sa Ligtas COVID Center sa Dumalag, Capiz ang tatlo nga nagpositibo kag iga-swab liwat pagkatapos sang 10 tubtob 14 ka adlaw.

Ginpahayag ni Peremne  nga iga-swab man pagkatapos sang isa ka semana ang ginabanta 10 tubtub 15 ka mga upod sa selda sang tatlo ka inmates nga nagpositibo.

Lunsay negatibo naman suno sa iya sa COVID-19 ang siyam ka mga personnel sang BJMP 6. –via Firingline, January 16, 2021