Anay PDEA 6 Director, gin-aresto matapos gintudlo nga mastermind sa pagpatay sa abogado sa Cebu City
By: Aine Grace Bravo | January 19, 2021
CEBU CITY – Gin-aresto si anay Philippine Drug Enforcement Agency (PDEA) 6 Director Retired Colonel Edwin Layese bangud sa gin-alegar kaangtanan sa kamatayon sang abogado sa Cebu City sang Nobyembre 23, 2020.
Si Layese ang ginatudlo sang confessed gunman nga si Fausto Edgar Benigno Peralta nga nag-supervise sa pagpatay kay Atty. Joey Luis Wee sa Barangay Kasambagan, Cebu City.
Gindakop si Layese sa sulod sang iya blue nga Toyota Hilux nga may plate number nga POE 061 sang Enero 13, 2021 malapit sa Fuente Osmeña, Cebu City. Ang Toyota Hilux nga may pareho nga plate number ang nakuhaan sang CCTV camera nga lakip sa mga getaway vehicles sang mga suspects matapos ang pagpatay kay Wee.
Nagpaguwa sang search warrant batuk kay Layese si Judge Mory Nueva sang Regional Trial Court Branch 13 sa Cebu City nga nagapahanugot sa taga-NBI nga usisaon ang salakyan sang suspect.
“Even before Peralta’s confession, we already have evidence showing Layese’s involvement in the crime. Peralta’s confession only strengthened the result of our investigation that Layese was involved in the killing of Attorney Wee,” suno kay NBI-7 Director Rennan Augustus Oliva.
Ginpahayag pa ni Oliva nga magluwas sa murder case, nagapangatubang man sang dugang nga kaso si Layese matapos nakuhaan sang .45 caliber pistol nga expired ang lisensiya kag naka-rehistro sa iban nga tawo sa iya salakyan.
Lakip sanday Layese kag Peralta sa mga ginpasakaan sang murder sang NBI may kaangtanan sa pagpatay sa nasambit nga abogado.
Ginbuyagyag man ni Oliva nga “He (Layese) is part of a gun-for-hire business. Accordingly, he and the other perpetrators in the slay of Attorney Wee would receive an amount of six-digit figures each if they successfully carry out the murder plot.”
Base man sa dugang nga imbestigasyon sang NBI, ginaangot man si Layese sa pag-ambush sa abogado nga si James Gupana sa Lapu-Lapu City sang Oktubre 10, 2020 pero wala napatay.
Ma-file man sang separado nga kaso batuk kay Layese, suno kay Oliva, may kaangtanan sa pagtiro kay Gupana.
Si Layese ang miyembro sang Philippine Military Academy Batch 1994 “Bantay Laya.” – via Inquirer