ILOILO CITY – May sabat ang MORE Power sa reklamo sang pila ka konsumedor nga wala naga-abot ukon delay ang pag-abot sang ila electric bill halin sang nagbulos ini nga power distributor sa syudad sang Pebrero 29, 2020.

Suno kay Mr. Niel Parcon, head sang Corporate Planning Department sang MORE Power, mabudlay ang ila pag-transition bangud wala sang gin-turn over nga records ang Panay Electric Company gani nag-mapping pa sila sang mga kuntador.

Gin-athag niya nga wala nalakip sa mapping ang balay sang mga konsumedor, rason nga may delay sa pagdul-ong sang billing.

“Mostly natultulan man namon, pero ang 8,000 (consumers) nga na, ang nabilin na da mga 700 na lang ang waay ma-identify. Ang waay ma-identify, medyo mabulubudlay na, kay ang iban na bala, gin-cluster ang meter, ang mga elevated na nga naka-bundle, mabudlay na i-identify,” suno kay Parcon.

Naka-apekto man sa delivery ang lockdown bangud sa COVID-19 pandemic.

Ginbuyagyag pa gid ni Parcon nga may mga agents sang courier nga ila gin-hire sa pagdul-ong sang billing sa La Paz kag Jaro districts nga indi on-time ang delivery kag may nagapeke sang pirma sang nagbaton.

Na-correct na ini, suno kay Parcon, paagi sa pag-ilis nila sang courier.

Ipa-usisa nama ni Parcon ang reklamo sang 71-anyos nga konsumedor nga gin-utdan sang kuryente bisan wala nakabaton sang bill halin Hulyo tubtob Disyembre.

Wala sang prior notice ang MORE Power suno sa tagreklamo kag nagdumdom pa siya nga nag-brownout lang.

Ginpa-athag ni Parcon nga nagapadala sila sang bill paagi sa email sa mga konsumedor nga naghatag sang email address, kag may ginapaagi man subong sa text message.

Posible nga wala nabuksan sang nagreklamo nga konsumedor ang iya email address, pero ipa-check ni Parcon kun ano ang natabu.

Ginpabutyag ni Parcon nga ginasunod sang MORE Power ang nakabutang sa Magna Carta for Residential Electricity Consumers nga dapat i-notify ang konsumedor antes ang disconnection.

Kun mapamatud-an nga wala nakabayad ang customer bangud wala nakabaton sang bill, pwede nga installment ang iya pagbayad. –Aksyon Hotline

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply