By: Aine Grace Bravo | January 22, 2021

ILOILO CITY – All-set na ang tanan para sa mga aktibidad sa selebrasyon sang Dinagyang Digital 2021 nga mangin virtual sa labing una nga tiun bangud sa COVID-19 pandemic.

Suno kay Ms. Joyce Clavecillas, spokesperson sang Iloilo Festivals Foundation, Inc., handa na ang Sto. Niño Religious Motorcade nga magasugod las-dos karon sa hapon, Enero 22.

Igalibot sa pito ka distrito ang 53-anyos nga imahe sang Sto. Niño.

Magasugod ang motorcade sa San Jose Parish Church, madiretso sa Bo. Obrero Church, La Paz Church, Jaro Cathedral, Mandurriao Church, Arevalo Church, Molo Church antes magbalik sa San Jose Parish Church.

Pwede nga makabantay sa karsada ang mga tumuluyo.

Pero pinaka-safe suno kay Clavecillas nga magtan-aw na lang sa livestreaming sa Facebook page sang Iloilo Dinagyang, Iloilo City Government, Mayor Jerry Treñas, IFFI Youtube Channel kag sa Aksyon Radyo Iloilo Facebook page. –via Aksyon Brian Valle