5 suspek nga nagpatay sa negosyante nga si Delfin Britanico sang Enero 2020, lunsay mga pulis — Assemblyman Buddy Britanico

ILOILO CITY – Nagalaum ang pamilya Britanico nga lubos nila maangkon ang hustisya sa pagpatay sa negosyante nga si Delfin Britanico sa Nabitasan, La Paz sang Enero 19, 2020.

Kasunod ini sang pagbuyagyag sang isa sa mga suspek nga si Police Corporal Joseph Andrew Joven nga mga pulis man ang iya kaupod sang natabu ang krimen.

Suno kay Former Assemblyman Salvador Britanico, si Joven ang nagserbe nga driver sang Mitsubishi Adventure nga gingamit nga salakyan sang nagpatay sa iya bata.

Sa sworn statement lakip ang application ni Joven nga mangin state witness nga gin-file sa Office of Prosecutor General sa Department of Justice, gintuad niya ang iya nahibaluan.

“Nag-file si Joven didto sang iya sworn statement, admitting that he was the driver sang salakyan.

Gin-identify niya ang mga killers ni Delfin, nga nagtiro kay Delfin.

Suno sa iya nga testimony kag sa amon man findings kay man na-interview man namon siya, nga ang una nga nagtiro si [Police Staff] Sergeant [Ricardo Cabrera] Morante kag pagkatapos sina, gin-finishing kill ni [Police Master] Sergeant [Vernie Lui] Escurial,” suno kay Assemblyman Britanico.

Nag-file naman sang affidavit si Britanico sa DOJ nga nagahingyo nga ilakip ang duha sa preliminary investigation bilang respondents sa krimen.

“Lima sila sa salakyan sina. Si Joven mismo ang nag-identify sang duha ka John Does nga responsible sa pagpatay kay Toto Del.” Sanday Morante kag Escurial ang ginatumod ni Britanico.

Sa impormasyon nga nabaton ni Britanico, may mga pending nga kaso si Morante. “Lima sila sa salakyan actually, si Joven, siya ang driver. Sa tu-o niya si Escurial, nagapungko. Didto sa likod si Morante sa tu-o kag dason ang upod ni Morante sa likod, si [Police Staff Sergeant Michael] de Felipe kag [Police Staff Sergeant Freddie] Libo-on.

Sa information nga ginhatag ni Joven, wala nakapanaug [sa salakyan] sanday de Felipe kag si Libo-on.”“Actually sa anti-drug campaign unit na sila tanan,” sang ginpamangkot si Britanico kun diin ang assignment sang mga pulis.

Ginpatay si Britanico, pila ka oras matapos nga ginpatay man paagi sa pagtiro si Allen Muller sa Cuartero, Jaro.

Antes natabu ang krimen, naghalin sa ila balay si Delfin sakay sa iya motorsiklo agud kuntani mag-check sang iya negosyo.

Sa Nabitasan Road siya nagguwa kag nakita sa guwa sang Prime Estate Subdivision ang salakyan sang mga nagpatay sa iya.

Nakatawag pa sa iya asawa si Delfin kag nagpahibalo nga may makaduluda nga tawo sa guwa sang subdivision. Nagpundo ang motorsiklo ni Delfin. “Si Morante, nanaug [sa salakyan] kag gintiro niya si Toto Del, naubos gid ang bala niya.

Pagkatapos sina nagsakay naman siya sa salakyan, pagkatapos na, nakita niya si Toto Del nga daw nagahulag-hulag pa kag nagatinguha nga magbangon. Amo to kag ginsingganan niya si Escurial nga panaugi kag i-finishing mo siya. So amo na nanaug naman si Escurial kag gin-finishing niya si Delfin. Dason nagpauli sila kag dason ginkuha ang cellphone ni Toto Del, dason nagbalik sila sa headquarters sang PNP, dira sa General Luna [Street, city proper].

Una na na-establisar nga si Joven ang nag-arkila sang salakyan tubtob natultulan siya sang gin-imbestigaran ini sang National Bureau of Investigation (NBI).

Nagapati si Britanico nga, “Apparently may connection. Buot silingon, pagtapos nila didto kay Muller, nagpalagyo sila kag pagpalagyo nila, dira sila nagpundo antes sang taytay [sa diin ginpatay si Delfin].”

Wala pa na-follow-up ni Britanico kun aktibo pa sa serbisyo ang mga ginpangmitlang niya nga pulis.