Leon Mayor Ma. Lina Holipas, ginapa-verify ang impormasyon nga na-infect sang new COVID-19 variant ang ROF nga nag-abot sa banwa sang Enero 9

Leon, Iloilo — Ginapa-verify pa ni Leon Mayor Ma. Lina Holipas ang impormasyon nga na-infect sang UK-variant sang COVID-19 ang 64-anyos nga Returning Overseas Filipino (ROF) nga nag-abot sa banwa sang Enero 9 kag gindiretso sa quarantine facility.

Suno kay Mayor Holipas, nabaton nila ang impormasyon halin sa Provincial Health Office kaina sang aga pinaagi sa ila Municipal Health Officer.

Dugang pa ni Mayor Holipas liwat nga gin-swab ang ROF pag-abot sa Leon kag negatibo naman ang resulta sa test.

Ginpahayag man ni Mayor Holipas nga wala sila sang may gina-uyatan nga dokumento nga nagapamatu-od nga na-infect sang UK-variant sang COVID-19 ang ROF.

Ginsaysay man ni Mayor Holipas nga gin-swab ang ROF sang January 12 kag negatibo ang resulta nga gin-release sang January 13.

Gin-athag man ni Mayor Holipas nga gin-release ang ROF sa facility sang January 14 kag gin-home quarantine.

Nagtapos na kuntani kahapon ang quarantine sang ROF apang liwat siya ipaidalum sa 14-day quarantine samtang gina-verify pa ang impormasyon.

Dugang ni Holipas, tumandok sang Jaro, Iloilo City ang ROF apang sa Leon na nagapauli.

Lakip ang 64-anyos nga ROF sa 16 ka kaso sang UK-variant sang COVID-19 sa Pilipinas nga gin-report sang Department of Health kagab-i.