Transport group ICLAJODA, indi pabor sa pagpatuman sang memorandum sang LTO nga kinahanglan makapasar sa motor vehicle inspection ang salakyan antes ipa-rehistro

ILOILO CITY –Indi pabor ang Iloilo City Loop Alliance of Jeepney Operators’ and Drivers Association (ICLAJODA) sa pagpatuman sang Memorandum Circular Number 2018-2158  sang Land Transportation Office (LTO) nga naga-require sa mga motorista nga magkuha sang certification sa Private Motor Vehicle Inspection Center nga nakapasar sa inspection ang salakyan. 

Suno kay  ICLAJODA President Raymundo “Boyet” Parcon, kun ipatuman sang LTO ang memo, 99 porsyento sang mga public utility jeepneys sa siyudad ang indi makapasar bangud daan na ang ila mga units.  

Kun indi makapasar sa inspection, indi man marehistro ang salakyan kag indi makabiyahe ang mga drivers.

Magluwas sini, mabug-at man para sa ila ang magbayad sang P1,800 nga inspection fee. 

Ginpahayag ni Parcon nga mapilitan ang mga operators nga ipakilo ang ila mga units bangud indi na ini mapuslan kun indi makapasar sa inspection.

Nagapangabay si Parcon sa LTO nga kuntani ipaiway ang pagpatuman sang memo samtang nagahulat pa sila nga maaprobahan sang bangko ang ila loan para sa pagbakal sang modernized jeepneys. –via Brian Valle