By: Aine Grace Bravo | January 27, 2021

LEMERY, Iloilo – Gin-lockdown ang Lemery Police Station kasunod sang pagpositibo sa COVID-19 sang ila hepe.

Suno kay PLT Francis Batallones, deputy chief sang Lemery MPS, nagtawag ang ila hepe nga si PCPT Edwin Belarmino kag nagpahibalo nga nagpositibo siya sa COVID-19.

Ginpa-idalom sa RT-PCR test si Belarmino sang nagpauli siya sa ila lugar para i-selebrar ang iya kaadlawan sa Cauayan, Negros Occidental.

Asymptomatic suno kay Batallones si Belarmino kag naka-quarantine na.

Gintipon naman ang tanan nga personnel sang Lemery MPS agud ipaidalom sa RT-PCR test sa Huwebes sang aga, Enero 28.

Nag-augment naman ang 2nd Mobile Force Battalion nga na-base sa Omio, Lemery, nga amo ang ma-responder kun may mga reklamo samtang ginahulat ang dugang nga augmentation halin sa Iloilo Police Provincial Office (IPPO). –via Dave Bucayan