Dugang nga gasto sa maintenance sang taxi, posible ipasa gihapon sa mga pasahero — ATOP President Perfecto Yap sa pag-require sang motor vehicle inspection certificate sa pagparehistro sang salakyan

Iloilo City—Ginpatimaan ni Association of Taxi Operators in Panay (ATOP) President Perfecto Yap nga ipasa gihapon sa mga pasahero ang madugang sa gasto para sa maintenance sang ila mga units.

Suno kay Yap, possible nga mabawi sa boundary “There is a possibility that we will be asking for something para sa maintenance cost namon.”

Ginplastar niya nga sa subong three percent sang total cost sang salakyan ang gasto nila sa maintenance pero bangud sa bag-o nga mga requirements nga tuman ka istrikto sang Land Transportation Office, mahimo ini nga five percent, “Diin namon bawiun ina? Indi man puwede nga amo man gihapon,” pahayag ni Yap.

Dugang niya, “There might be a reaction sa amon nga part to ask for an increase sa flag down naton or sa succeeding nga mga kilometers.”

Ang LTO maga-require na sang inspection certification sa mga motor vehicles antes makaparehistro ang tag-iya sa idalum sang Motor Vehicle Inspection System.

Suno kay Yap, welcome para sa ila ang plano bangud para ini sa pagsiguro sang road worthiness sang mga salakyan.

Pero indi ini suno sa iya madali-dali kag kinahanglan ang transition period sa bahin sang mga operators kag pati man sa tag-iya sang private motor vehicle inspection center.

Ginhinambit man niya nga 2018 pa ang memorandum sang LTO pero sang katapusan nga quarter sang 2020 na sila napahibalo parte sini.

Importante man suno sa iya nga maplastar ang mga parameters, kun ano ang basehan sa inspeksyon kag kun ano ang dapat kay-uhon antes dal-un sa center ang salakyan para sa inspeksyon.

Dugang niya, wala kuntani sang problema kun libre ang pagbalik para sa dugang nga inspeksyon pero may balayran gihapon.

Una na ginhinambit ni Yap nga mas maayo kun tutukan anay sang LTO ang driving skills sang mga motorista bangud kalabanan sa mga rason sang road accidents ang human error.

Mas pabor si Yap nga i-edukar ang mga motorista sa pag-drive bangud may yara sang na-isyuhan sang lisensya bisan alang-alang.

Ginpahayag ni Yap nga kun istrikto nga ipatuman ang memorandum sang LTO, madamo nga salakyan ilabe na ang mga public utility vehicles ang indi makabiyahe.

Ginpahayag naman ni Atty. Gaudioso Geduspan, Assistant Regional Director sang LTO6 nga kinahanglan ipa-check ang mga salakyan antes dal-un sa PMVIC agud makapasar.

Masobra sa 60 ka points ang i-inspect sa kada salakyan suno kay Geduspan.P1,800 ang inspection fee sa 1st testing para sa 4-wheeled vehicles samtang P600 para sa motorsiklo.

Kun pananglitan indi makapasar sa 1st testing, P900 ang balaydan para sa re-testing sa 4-wheeled vehicle samtang P300 ang bayad sa re-testing sa motorsiklo.

Sa Roxas City, Capiz, operational na ang Private Motor Vehicle Inspection Center.Samtang, gina-fast track man ang construction sang tatlo ka PMVICs sa Iloilo City kag apat sa Iloilo Province. — via Aksyon Hotline