By: Aine Grace Bravo/Aljohn Torreta | January 28, 2021

OTON, Iloilo – Ginpalubong na ang duha ka mga tigulang nga nasapwan sa Barangay Botong, Oton sang Disyembre 26, 2020.

Suno sa Iloilo Police Provincial Office, ginlubong ang mga tigulang sa Oton Public Cemetery la-1:00 kaina sang hapon, Enero 28. Antes ginlubong, ginpa-bendisyonan sa pari ang duha.

Ginhamyang sa punerarya sa Oton ang mga bangkay sugod sang nasapwan apang wala sang may nag-claim sa ila.

Nasapwan ang duha nga patay na sa sulod sang ginarentahan nga balay. Indi familiar ang mga residente sa barangay kag tag-iya sang ginaparentahan nga balay sa ila.

Base san na-recover nga mga IDs sa balay, nagahingalan Antonio Cabanatan ang lalaki, apang gina-verify sang mga pulis bangud lain-lain ang address nga ginagamit niya sa mga IDs. May ID man nga may picture sang lalaki pero nagangalan Pastor Macatimpag.

Sa pag-check, may Antonio Cabanatan nga Secretary sang Mindanao Commission sang Communist Party of the Philippines-New People’s Army.

Ginakuhaan sang Aksyon Radyo Iloilo sang pahayag ang Oton police sa resulta sang pinaka-ulihi nila nga imbestigasyon apang wala pa sila nakahatag.