By: Aine Grace Bravo | January 28, 2021

ILOILO – “Butigon ka Joven. Butigon ka!”

Ini ang sulit-sulit nga pahayag ni Police Staff Sergeant Michael De Felipe nga nagatumod sa iya kasubong nga pulis nga si Corporal Joseph Andrew Joven nga nagmitlang sa iya nga naka-upod sa salakyan sang tiempo nga ginpatay ang negosyante nga si Delfin Britanico sang Enero 19, 2020.

Sa pag-atubang ni De Felipe sa media kaupod ang iya abogado nga si Atty. Hernando Galvez, ginpanghiwala niya nga naka-updanay sila ni Joven sang natabu ang krimen.

Ginrason niya nga yara siya sa ospital sang amo gid nga tiun bangud nagbata ang iya asawa.

Suno kay De Felipe, “Gusto ko atubangon ni Joven ang paghigko niya sa pangalan ko. Atubangon niya ko kay gusto ko maklaruhan ang tanan. Ako ya pangitaun ko gid ya ang hustisya. Ginguba niya ang pagkatawo ko gid. Butigon gid na siya! Butigon! Kuging na siya.”

Ginalantaw nga rason ni De Felipe sa paghinambit ni Joven sa iya pangalan ang pagsaway niya diri sadto bangud sang impormasyon nga nagagamit sang illegal nga druga kag protector man sa drug trade.

Sa statement ni Joven kay anay Assemblyman Salvador Britanico, amay ni Delfin, naka-upod lang sa salakyan si De Felipe pero wala siya nakatiro sa biktima. Gintudlo ni Joven sanday Police Staff Sergeant Ricardo Morante kag Police Master Sgt Vernie Lui Escorial nga amo gid ang nagtiro. Upod man sa salakyan si police Staff Sgt Freddie Libon-on pero wala man nakatiro suno kay Joven.

Suno kay De Felipe, kilala niya si Joven kag naka-updanay sila sang makadali sa mobile force.

Wala naman niya naka-upod sa trabaho sanday Morante kag Escorial, “Si Morante kag Escorial senior ko na sa serbisyo. Kilala ko na sila bilang sa pagka-pulis kag never ko na sila naupod sa trabaho. Mga suplado na sir muh. Matulok ka na sa ila, tulukon ka lang nila ti masapak ka pa na? Kilala ko lang na sila sa pagka-pulis.”

Dugang niya, “Kilala ko si Libo-on. Kilala ko na siya kay updanay kami sa CDEU. Si Libo-on tam-an na ka buot kag relihiyoso. Family-oriented gid na siya. Tutok na siya sa bata kag asawa niya. Amo na ka buot kay Libo-on. Kun sa trabaho, updanay kami, magsiling nga may operation kami, may i-buy bust, kami na gabinuligay para ma-accomplish namon ang trabaho.”

Ginpahayag naman ni Atty. Galvez nga nag-request na sila sang authentic nga copy sang gin-alegar statement ni Joven para mahibaluan kun ano ang ila masunod nga tikang.

Suno kay Galvez, bisan wala nagpasaka sang kaso ang mga Britanico kay De Felipe pero nahigkuan ang pangalan niya sang ginlawag siya ni Joven kag gin-imply nga involved siya sa krimen, “Bisan wala siya (De Felipe) gin-mention nga nakatiro, may implication nga involved siya sa krimen. Indi manami sa pulis nga sa imo presensiya lantawon mo lang nga gina-commit ang krimen.”

Ginhinambit ni Galvez ang perjury, serious dishonesty kag serious misconduct ang mga posible kaso kay Joven.

Gindugang niya nga may impormasyon sila nga si Joven nagpalagyo sa duha ka drug testing nga gin-conduct sang kapulisan.

Suno pa kay Galvez, pamatud-an nila nga yara sa ospital si De Felipe sang natabu ang krimen. May mga papeles sa ospital nga may pirma ni De Felipe suno kay Galvez kag imposible man nga bayan niya ang iya asawa nga kritikal sa ospital ilabe na nga ginpaidalum sa caesarian operation.

“Ang pagkakilala sang pamilya ko sa akon buot nga tatay tapos amo na ang ginhambal ni Joven sa akon. Sakit sir. Sakit, sakit,” dugang nga statement ni De Felipe.

Si De Felipe ang na-assign sa Iloilo City Drug Enforcement Unit halin sang 2017 tubtob 2021. La Paz Police Station ang iya subong nga assignment.

Nakabaton na sang verbal order si De Felipe sa pag-relieve sa iya pakadto sa Regional Personnel Holding and Accounting Unit. –via Aksyon Hotline