Information dissemination sa Child Car Seat Law, tutukan sang LTO 6
By: Aine Grace Bravo | February 2, 2021
ILOILO CITY – Maga-sentro sa information dissemination ang mangin operasyon sang Land Transportation Office 6 subong nga adlaw, Pebrero 2, may kaangtanan sa pagpatuman sang Child Safety in Motor Vehicles Act.
Ini ang ginpaathag ni Atty. Gaudioso Geduspan, assistant regional director sang LTO 6, sa una nga adlaw sang implementasyon sang laye.
Suno kay Geduspan, exempted sa laye ang kabataan nga naga-edad sang 12-anyos panubo apang 4’11 ukon lapaw pa ang height.
Indi na sila pag-i require nga magpungko sa child seat, apang dapat nga maggamit sang seat belt.
Pasugtan naman suno kay Geduspan nga makapungko sa front seat ang bata nga naga-edad 12-anyos panubo nga 4’11 ukon lapaw pa ang height, pero dapat sila nga mag-seat belt.
Ginpahayag ni Geduspan nga maga-coordinate sila subong ng adlaw sa taga-Department of Trade and Industry (DTI) agud hambalan ang standard sang child car seat kag kun diin ini mabakal.
Ginpabutyag niya man nga dapat accredited ang nagabaligya sang child seat. –via Aksyon Reports Morning Edition